The Simpsons leiðrétta mistök

Stjórnendum þáttarins „The Simpsons“ er fátt heilagt og ekki er algengt að þeir biðjist afsökunar á því sem þar kemur fram. Í síðasta þætti er hins vegar að finna leiðréttingu á mistökum sem gerð voru í fyrri þætti.

Kristen Schaal var gestaleikari í þættinum, en einn af dyggum aðdáendum þáttarins benti á að vitlaust hefði verið farið með nafn hennar í lok þáttar þar sem nafn hennar var ritað „Kristen Schall“. Í síðasta þætti var Bart Simpson látinn leiðrétta þessi mistök í upphafi þáttar þegar hann er tekinn upp að töflu í skólastofunni.

Leikkonan skrifaði á Twitter: „Vá! Takk Simpsons fyrir leiðréttinguna á krítartöflunni. Í get ekki hætt að brosa. Enginn hefur áður verið eins elskulegur. Frábært.“