Ætlar að horfa á heimsendi í sjónvarpi

Bandaríski sjónvarpsprédikarinn Harold Camping, sem spáir því að heimsendir verði á morgun, ætlar að fylgjast með ragnarökunum í sjónvarpinu.

Camping, sem er 89 ára, hefur áður komið fram með spádóma, sem ekki hafa ræst. Hann spáði því meðal annars að Jesús Kristur myndi stíga niður á jörðina að nýju árið 1994. 

Nú segist hann viss um, að miklir jarðskjálftar muni ríða yfir jörðina á morgun og að hinir sanntrúuðu muni fara til himna.

„Það er enginn efi á að þetta mun gerast," sagði Camping við Reutersfréttastofuna. 

Camping stýrir Family Stations Inc. sem rekur útvarpsstöðvar um öll Bandaríkin og víðar.  Stuðningsmenn hans hafa hengt upp þúsundir auglýsinga þar sem varað er við dómsdeginum og aðrir hafa ekið um Bandaríkin til að koma fréttunum á framfæri. 

Camping, sem er verkfræðingur að mennt og rak um tíma byggingarfyrirtæki," ætlar að dvelja ásamt konu sinni í Alameda í norðurhluta Kalíforníu á morgun og fylgjast með hamförunum.

Líkt og fyrri spár byggir Camping dómsdagsspá sína á biblíunni og ýmsum útreikningum á atburðum, sem þar er sagt frá, svo sem Nóaflóðinu.  

• 2 blogg um fréttina

Bloggað um fréttina

• Guðsteinn Haukur Barkarson: Útilega mannkyns búinn samkvæmt Harold Camping
• Mofi: Heimsendir á morgun?