Veröld/Fólk | Veraldarfréttir | mbl | 30.5.2011 | 7:58

Í g-streng í vegarkanti

G-strengur veitir lítið skjól þegar staðið er úti í vegarkanti. Mynd úr myndasafni.

35 ára gamall karlmaður frá Ikast í Danmörku var í morgun dæmdur í tveggja mánaða fangelsi fyrir að hafa skilið fyrrum sambýliskonu sína eftir fáklædda í vegarkanti í fyrra.

Frá þessu segir á vefsíðu danska dagblaðsins Jyllands-Posten.

Parið hafði verið í veislu, þar sem slest hafði upp á samskipti þeirra. Er þau komu heim til sín urðu þau ásátt um að ljúka sambandinu.

Konan pakkaði eigum mannsins niður og vísaði honum til hvílu á stofusófanum, þannig að hún ætti hægara um vik að vísa honum á dyr morguninn eftir.

Þegar parið reis úr rekkju morguninn eftir tóku þau til við rifrildið þar sem frá var horfið og slagsmál brutust út á milli þeirra. Konan hringdi þá á lögreglu, en maðurinn fór inn í bíl sinn og ætlaði að aka á brott.

Konunni hugnaðist ekki að hann skyldi ætla að flýja undan laganna vörðum og elti hann inn í bílinn fremur fáklædd, en hún var klæddi í brjóstahaldara og g-streng.

Maðurinn ók af stað og konan jós yfir hann skömmum. Er komið var á hraðbraut sagðist hann að eigin sögn ekki hafa getað hlustað á þetta lengur og bar konuna út úr bílnum og skildi hana eftir fáklædda í vegarkantinum.