Glimrandi gagnrýni um tónleika sem var aflýst

Austurrískur tónlistargagnrýnandi var frekar óheppinn þegar hann skrifaði afar lofsamlega gagnrýni í blað sitt á mánudag um tónleika breska tónlistarmannsins Georges Michaels. 

Fram kemur á vef Die Presse, að gagnrýnandinn hafi í umsögninni lýst fjálglega lögunum, sem George Michael söng. „Hann „swingar" og djassar með gæsahúðarröddu sinni gegnum tónlistarperlur á borð við lag Ninu Simone, My Baby Just Cares For Me, Let Her Down Easy, eftir Terence Trent D'arby og Roxanne frá Sting," stóð í blaðinu Krone.

Með greininni birtust stórar myndir af söngvarnum þenja lungun og undir stóð að hann hefði sigrað hjörtu Vínarbúa með frábærum lögum sínum.

Það var aðeins eitt vandamál: Tónleikunum hafði nefnilega verið aflýst því Michael var lagður inn á sjúkrahús í Vínarborg með sýkingu í lungum.

• 1 blogg um fréttina

Bloggað um fréttina

• Ómar Ragnarsson: Lýsing á golfmóti sem aldrei var háð. Viðtal við dauðan …