Naktir hjólreiðamenn fylltu götur

„Sérðu mig núna?“ spurðu naktir hjólreiðamenn sem hjóluðu mörg hundruð um götur til að vekja athygli á öryggismálum hjólreiðamanna. Slagorðið máluðu þeir á líkama sína. Þeir vildu einnig með þessum hætti vekja athygli á þeirri hollu hreyfingu sem hjólreiðar eru og hversu umhverfisvænn slíkur ferðamáti er.

Þessi óvenjulega samkoma átti sér stað í mexíkósku borginni Puebla í gær. Hópurinn safnaðist fyrir á fjölförnustu götu bæjarins, um 120 kílómetrum frá Mexíkóborg.

„Við viljum breytingar,“ sagði Arturo Rivera, einn þátttakenda.

Sumar konurnar voru í bikiníum en flestallir karlmennirnir ákváðu að vera allsnaktir er þeir hjóluðu um borgina í rigningunni.

Viðburðurinn tengist hreyfingu sem kallar sig World Naked Bike Ride og hefur staðið fyrir álíka viðburðum víðar um heiminn.

Í Mexíkó var ákveðið að taka þátt til að vekja athygli á bágu öryggi hjólreiðamanna í umferðinni þar í landi. Tveir hjólreiðamenn létu lífið í umferðarslysum nýverið.

• 1 blogg um fréttina

Bloggað um fréttina

• Hjördís Vilhjálmsdóttir: Þjóðarstripp