Notaði teygjubyssu sem vopn

Fimmtugur karlmaður í Marylandríki í Bandaríkjunum var handtekinn af lögreglu grunaður um að hafa skotið hörðum marmarakúlum að hraðamyndavél. Maðurinn, sem heitir Bruce Lawrence May, hefur verið látinn laus gegn tryggingu á meðan beðið er dóms í málinu.

May var m.a. ákærður fyrir eignaspjöll og fyrir að hafa notað teygjubyssu sem vopn en hann er sagður hafa vísvitandi skotið nokkrum marmarakúlum af miklu afli á bifreið lögreglu sem innihélt hraðamyndavél.

Vitni segist hafa séð May skjóta nokkrum sinnum úr teygjubyssu á meðan hann ók bifreið sinni framhjá myndavélabíl lögreglunnar.

May er nú laus gegn 3.000 bandaríkjadala tryggingu en samkvæmt upplýsingum frá lögreglu var hann nýlega myndaður í tvígang af hraðamyndavél og mun það vera ástæða verknaðarins.

• 1 blogg um fréttina

Bloggað um fréttina

• Ásgrímur Hartmannsson: Notaði vopn sem vopn!