Ellefu milljón króna áfylling

Banda­rísk­ur karl­maður vissi ekki hvaðan á hann stóð veðrið á dög­un­um þegar greiðslu­korti hans var hafnað við kaup á sam­loku Í Nashville. Hann hafði ný­lega fengið út­borgað og ekki gert annað en að fylla bif­reið sína með eldsneyti.

Þegar maður­inn, Ray Crockett, hringdi í viðskipta­banka sinn, Citi­bank, til að at­huga stöðuna á reikn­ingn­um var hon­um sagt að það vantaði tæp­ar ell­efu millj­ón­ir til að hann stæði á sléttu.

For­viða spurði maður­inn út í ný­leg­ar færsl­ur og kom þá í ljós að fyr­ir 30 dala áfyll­ingu á Nis­s­an Max­ima-bif­reið var hann rukkaður um 84.522 dali, jafn­v­irði ell­efu millj­ón ís­lenskra króna.

Vissi ekki hvernig hann gæti keypt sér mat

Crockett áleit að þetta væri villa sem auðvelt væri að laga, enda frá­leitt að hann gæti dælt eldsneyti fyr­ir ell­efu millj­ón­ir á jafn litla bif­reið. En allt kom fyr­ir ekki. Mapco, þar sem hann tók eldsneytið, sagðist ekk­ert geta gert og enga hjálp fékk hann frá Citi­bank.

Þegar þar var komið sögu var Crockett orðinn veru­lega áhyggju­full­ur enda hafði enga fjár­muni und­ir hönd­um og vissi vart hvernig hann ætti að geta keypt sér mat­ar­bita. Mapco lét hann þá fá gjafa­kort upp á 100 dali, jafn­v­irði um 12 þúsund króna, til að lifa af á meðan málið var skoðað frek­ar.

Ekk­ert gerðist hins veg­ar í máli manns­ins og að lok­um hætti Mapco að svara sím­töl­um Crocketts. Það var svo ekki fyrr en um viku eft­ir að hann fyllti á bif­reið sína sem Citi­bank leysti úr mál­inu með því að bak­færa upp­hæðina.

Fleiri dæmi um sam­bæri­leg mis­tök

Þetta er ekki í fyrsta skipti sem þetta kem­ur fyr­ir hjá viðskipta­vin­um Mapco því dæmi er um konu sem var rukkuð um jafn­v­irði 7,5 millj­ón króna fyr­ir eðli­leg eldsneytis­kaup sín.

Mapco sendi frá sér til­kynn­ingu vegna máls Crocketts þar sem seg­ir að mis­tök sem þessi séu sjald­gæf en geti komið fyr­ir. Nokkr­ar ástæður geti verið fyr­ir þeim, bæði tækni­leg­ar og mann­leg­ar.

• 1 blogg um frétt­ina

Bloggað um frétt­ina

• Pálmi Hamilt­on Lord: Stuld­ur á há­björt­um degi