Biðst vægðar vegna offitu

Fangi á dauðadeild í fangelsi í Ohioríki í Bandaríkjunum hefur farið fram á það við dómstóla að honum verði hlíft við aftöku vegna offitu. Segir hann eitursprautu munu taka tíma að virka vegna líkamsfitunnar og hafa í för með sér afar kvalafullan dauðdaga.

Hinn 53 ára gamli Ronald Post var dæmdur til dauða fyrir morð á hótelstarfsmanni í vopnuðu ráni. Hann hefur beðið í 28 ár á dauðadeildinni en ráðgert er að Post verði tekinn af lífi 16. janúar næstkomandi.

Post er engin smásmíði en hann vegur 220 kíló. Íbeiðni til dómstóla segja lögmenn hans verulegar líkur á því að vegna heilsufars Post muni miklar líkamlegar og andlegar kvalir  leiða af tilraunum til að sprauta hann með eitri. Slík aftaka myndi ekki líða fljótt hjá, heldur dragast á langinn og verða þjáningarmikil.

Lögmenn Post segja að svæfingalæknir hafi metið það svo, að viðteknar venjur við aftöku fanga með eitursprautu í Ohio muni ekki virka á hann sem aðra. Ef sprautan dygði yfir höfuð til að deyða hann gæti dauðastríð hans tekið allt að 16 stundir.

Í Ohio eru fangar líflátnir einvörðungu með eitursprautu, með einföldum skammti af lyfinu pentobarbital. Upp á aðrar aftökuaðferðir er ekki boðið í ríki þessu.

Auk þessa hafa lögmenn Post efasemdir um að dauðabekkurinn sem aftakan fer fram á þoli líkamsþyngd fangans. Hann hefur reynt að grennast með líkamsæfingum en liðamótaverkir hafa hamlað því. Þá hafa líkamsræktartæki viljað brotna undan þunga hans.

• 1 blogg um fréttina

Bloggað um fréttina

• Sigurður Þórðarson: Ekki ætti að drepa feita menn