Tók leigubíl frá Danmörku til Rómar

Leigubílstjóri í Óðinsvéum í Danmörku tókst á við lengsta verkefni lífs síns í síðustu viku þegar maður á þrítugsaldri settist upp í bifreið hans og bað hann að aka sér til Rómar. Farþeginn ætlaði nefnilega að skoða Péturskirkjuna í Rómarborg. 

„Hann vildi skoða einhverja kirkju í Róm. Ég hélt fyrst að hann ætlaði á flugvöllinn, en svo kom í ljós að hann vildi fara akandi. Svo rétti hann mér greiðslukortið sitt og ég sá að hann var með heimild, þannig að ég ók bara af stað,“ sagði leigubílstjórinn í samtali við Metroexpress. 

Oft er hægt að semja um fast verð ef aka á langar vegalengdir, en Daninn káti vildi frekar láta mælinn ganga alla leiðina. Ferðin tók þrjá daga og endaði reikningurinn í um 30 þúsund dönskum krónum, um 625 þúsund íslenskum. 

Leigubílstjórinn segist ekki hafa sofið mikið á leiðinni. En þegar hann kom á leiðarenda fékk hann sér samloku á veitingastað og lagði sig áður en hann hélt heim á leið. Alla leiðina suður til Ítalíu var hann í stöðugu sambandi við leigubílastöðina, sem gaf honum leiðbeiningar um það hver væri besta leiðin til Rómar og hvernig mætti komast hjá sem mestri umferð. 

Sjá frétt Metroexpress. 

• 1 blogg um fréttina

Bloggað um fréttina

• Haraldur Haraldsson: Tók leigubíl frá Óðinsvéum til Rómar//Það er svo að manni …