Erlent | mbl | 5.7.2006 | 9:27

Norður-Kóreumenn skutu sjöundu tilraunaeldflauginni á loft

Bandaríska flugmóðurskipið Kitty Hawk sést hér yfirgefa höfnina í Otaru í Japan í morgun. Skipið lagði úr höfn á eftir að Bandaríkjastjórn fékk veður af tilraunaskotum Norður-Kóreumanna. AP

Norður-Kóreumenn hafa skotið sjöundu tilraunaeldflauginni á loft, en þetta hefur japanska fréttastofan Kyodo eftir heimildarmönnum sínum innan japönsku ríkisstjórnarinnar. Skotið átti sér stað klukkan 17:22 að japönskum tíma, eða klukkan 8:22 að íslenskum.

Fréttir af þessu berast klukkustundum eftir að Norður-Kórea skaut að minnsta kosti sex tilraunaeldflaugum á loft, þ.á .m langdrægri Taepodong-2 eldflaug. Alþjóðasamfélagið hefur fordæmt tilraunaskotin.

Öryggisráð Sameinuðu þjóðanna munu halda neyðarfund að beiðni Japana til þess að ræða þróun mála.

Fram kemur í japönskum fjölmiðlum að norður-kóresk yfirvöld þrjóskist við og segi að málið snerti sjálfstjórnarmál þeirra.

Fréttaskýrendur segja að yfirvöld í Norður-Kóreu líti á þess sem leið til þess að fá athygli og leysa upp þá diplómatísku pattstöðu sem hefur ríkt í tengslum við viðræður um kjarnorkugetu þeirra.