Viðskiptaráðherra Svíþjóðar segir af sér eftir aðeins eina viku í starfi

Maria Borelius, viðskiptaráðherra Svíþjóðar, hefur sagt af sér eftir að hafa aðeins gegnt embættinu í eina viku, en málið tengist launagreiðslum sem hún greiddi dagmæðrum á 10. áratug síðustu aldar sem ekki voru gefnar upp til skatts. Það var Fredrik Reinfeldt, forsætisráðherra Svíþjóðar, sem greindi frá uppsögn Borelius í útvarpsviðtali í dag.

Reinfeldt sagði í viðtali við sænska ríkisútvarpið að hann hefði rætt við Borelius fyrr í dag og „við urðum sammála um að hún ætti að segja af sér.“

Borelius, sem er fjögurra barna móðir, viðurkenndi í síðustu viku að hún hafi greitt dagmæðrum sínum svart á á tíunda áratugnum, en hún segir að hún hafi annars ekki haft efni á pössun fyrir börnin sín.

Þá slapp hún við að greiða skatt á sveitasetri sínu í Suður-Svíþjóð en húsið er skráð á félag í skattaskjólinu Jersey að því er sænskir fjölmiðlar hafa greint frá.

• 1 blogg um fréttina

Bloggað um fréttina

• Stefán Friðrik Stefánsson: Hneyksli skekja sænsku stjórnina