Erlent | mbl | 24.10.2006 | 9:43 | Uppfært 11:15

Milosevic boðið að kjósa um framtíð Kosovo

Kosovo múslímar biðja á götu í Pristina, höfuðborg Kosovo-héraðs, en Eid al-Fitr hátíð þeirra hófst í gær. AP

Slobodan Milosevic, fyrrum forseti Júgóslavíu og Serbíu, hefur verið boðið að taka þátt í þjóðaratkvæðagreiðslu í Serbíu um framtíð Kosovo-héraðs sem fram á að fara um helgina, en Milosevic lést í mars á þessu ári í haldi stríðsglæpadómstóls Sameinuðu þjóðanna í Haag. Þetta kemur fram á fréttavef BBC.

Samkvæmt fréttum serbneskra dagblaða var kosningakort sent út fyrir Milosevic þar sem fram kemur að hann sé á kjörskrá í úthverfi Belgrad.

Þjóðaratkvæðagreiðslan um helgina fylgir í kjölfar lagabreytinga sem samþykktar voru á serbneska þinginu í síðasta mánuði þar sem kveðið er á um stjórnarskrárbreytingar varðandi stöðu Kosovo-héraðs.

Milosevic háði harða baráttu fyrir því í lok síðustu aldar að halda Kosovo innan júgóslavneska ríkjasambandsins og árið 1999 gerði Atlantshafsbandalagið loftárásir á Serbíu til að stöðva hernaðaraðgerðir þeirra í Kosovo. Í kjölfarið var Milosevic steypt af stóli og árið 2001 var hann framseldur til stríðsglæpadómstólsins. Réttarhöld stóðu yfir yfir honum er hann lést af völdum hjartaáfalls í fangaklefa sínum.