Hálfbróðir Saddams Husseins tekinn af lífi

Hálfbróðir Saddams Husseins og fyrrum yfirmaður Byltingardómstóls Íraks hafa verið hengdir. Frá þessu greindi saksóknarinn Munqith al-Faroon. Aftökurnar áttu sér stað fyrir dögun í dag að hans sögn.

Barzan al-Tikriti og Awad Hamad al-Bandar voru dæmdir sekir um aðild sína að morðum á 148 sjítum árið 1982, eftir að tilraun til að ráða Saddam Hussein mistókst í Dujail.

Hussein var hengdur þann 30. desember sl. eftir að hafa verið fundinn sekur um sama glæp.

Barzan al-Tikriti var hálfbróðir Hussein og starfaði sem yfirmaður írösku leynilögreglunnar.

Hann var háttsettur meðlimur Íraksstjórnar þegar Bandaríkin gerðu innrás í landið árið 2003 og hann var einn af þeim lykilmönnum sem handsama átti.

Awad Hamad al-Bandar var yfirdómari Byltingardómstólsins. Í ákærunni gagnvart honum sagði m.a. að hann hafi staðið fyrir sýndarréttarhöldum sem leiddu oftar en ekki til þess að fólk var tekið af lífi.

Awad Hamed al-Bandar. Reuters

• 1 blogg um fréttina

Bloggað um fréttina

• Hlynur Hallsson: Írak, fátækt og Alþingi í dag