Brixtofte í 2 ára fangelsi

Eystri Landsréttur í Danmörku dæmdi í dag Peter Brixtofte, fyrrum borgarstjóra í Farum, í tveggja ára óskilorðsbundið fangelsi fyrir fjárdrátt í opinberu starfi. Ekki er hægt að áfrýja dómnum, að sögn danskra fjölmiðla.

Brixtofte, sem er 57 ára, var fundinn sekur um að hafa látið bæjarsjóð Farum greiða verktakafyrirtækinu Skanska 9 milljónum danskra króna of hátt verð fyrir verk á vegum bæjarins. Á móti greiddi Skanska 10 milljónir danskra króna til að styrkja handboltaliðið Ajax-Farum. Það lið var einskonar dótturlið íþróttafélagsins Farum Boldklub en Brixtofte var þar formaður og hluthafi.

Héraðsdómur í Hillerød dæmdi Brixtofte í 2 ára fangelsi í sumar vegna málsins. Brixtofte áfrýjaði dómnum og krafðist sýknu. Þrír aðrir menn hlutu skilorðsbundna fangelsisdóma, þar á meðal fyrrum forstjóri Skanska, sem viðurkenndi að hafa gert samning við Brixtofte um að rukka bæjarsjóð Farum um of háa upphæð fyrir verk svo Skanska gæti styrkt handboltafélagið.

• 1 blogg um fréttina

Bloggað um fréttina

• Einar Ben: Danir eiga