Liverpool og Birmingham ruddalegustu borgir Bretlandseyja skv. könnun

Liverpool og Birmingham er ruddalegustu borgir Bretlandseyja ef marka má niðurstöður nýrrar könnunar. Þar segir að borgarbúar, sem á ensku kallast „Scousers“ og „Brummies“, séu að meðaltali ólíklegri en aðrir landsmenn að standa upp fyrir óléttri konu eða eldri borgara í strætó, opna hurðir fyrir konur eða mæta eitthvert á réttum tíma.

Aftur á móti þykja Glasgow og Sheffield vera þær borgir þar sem borgarbúar eru hvað kurteisastir skv. könnuninni, sem verslunarkeðjan Somerfield stóð að.

Um 99% íbúa Glasgow segjast ávallt bjóða óléttum konum eða eldri borgurum sætið sitt í strætó miðað við 88% íbúa Liverpool og um 90% íbúa Birmingham.

Íbúar Sheffield þykja vera stundvísari en aðrir Bretar, en 88% Sheffield-búa halda því fram að þeir myndu mæta á réttum tíma í kvöldverðarborð eða veislu.

Lundúnabúar þykja þeir óstundvísustu, en um fjórðungur þeirra segir að það sé í góðu lagi að mæta um 15 mínútum of seint.

Riddaramennskan er í fyrirrúmi hjá Skotum en 86% karla í Glasgow og 79% þeirra í Aberdeen segjast opna hurðir fyrir konur miðað við 62% í Birmingham og Liverpool.

Yfir 1.500 manns tóku þátt í könnuninni sem var gerð á milli 22. janúar til 1. febrúar sl.

• 2 blogg um fréttina

Bloggað um fréttina

• Árni Gunnar Ásgeirsson: Riddaramennska?
• Matthias Freyr Matthiasson: Liverpool......ruddar og dusilmenni