Erlent | mbl | 20.2.2007 | 11:20 | Uppfært 13:24

Segir unga dóttur hafa tekið við starfi vændiskonu af móður sinni

Danskur maður sem sakaður er um að hafa beitt dóttur sína grófu kynferðislegu ofbeldi og selt öðrum körlum aðgang að henni í Tønder í Danmörku hefur játað á sig allar þær sakir sem bornar eru á hann í málinu. Fram kom við réttarhöldin yfir manninum í dag að við yfirheyrslur yfir honum í desember á síðasta ári hafi hann sagt að stúlkan, sem þá var ellefu ára gömul, hafi tekið við starfi vændiskonunnar á heimilinu eftir að móðir hennar yfirgaf heimilið árið 2004. Þetta kemur fram á fréttavef Jyllands-Posten.

Stefnt er að því að dómur verði felldur yfir föðurnum í dag en hann á allt að tólf ára fangelsisdóm yfir höfði sér.

Áður hafa þrettán karlmenn verið sakfelldir í málinu og hafa þeir sem höfðu einu sinni samræði við stúlkuna hlotið eins árs fangelsisdóma en þeir sem höfðu oftar samræði við hana hlotið þriggja ára fangelsisdóma. Fram kom við réttarhöldin yfir þeim að stundum hafi faðir stúlkunnar og fleira fólk verið viðstatt er stúlkunni var nauðgað en faðirinn seldi hana fyrir væga peningaþóknun, bjór og klámmyndbönd.

Þá beitti maðurinn einnig yngri dóttur sína kynferðislegu ofbeldi og varð móðir stúlknanna margoft vitni að ofbeldinu er hún bjó á heimilinu.