Norski olíusjóðurinn: Rúmar fjórar milljónir á mann

Fjárfestingasjóðurinn digri sem geymir olíugróða Norðmanna hefur enn gildnað, að því er tilkynnt var í dag, og hefur hann fest sig í sessi sem einn stærsti sjóður heims.

Sjóðurinn heitir opinberlega Opinberi eftirlaunasjóðurinn og er ætlaður til að greiða eftirlaun komandi kynslóða í Noregi.

Þarlendir fjölmiðlar bentu á í dag, að stærð sjóðsins þýði að hver einasti landsmaður eigi þar nú sem svarar rúmum fjórum milljónum íslenskra króna. Norðmenn eru tæplega 4,7 milljónir.

Frá þessu segir á fréttavef Aftenposten.

Sjóðurinn var stofnaður fyrir tíu árum og lögðu stjórnvöld þá í hann tvo milljarða norskra króna, en núna eru í sjóðnum hvorki meira né minna en 1.784 milljarðar norskra króna, að því er norski seðlabankinn greindi frá í dag.

Noregur er þriðja mesta olíuútflutningsríki heims, og mesti gasframleiðandi í Evrópu.

Sjóðurinn fjárfestir í erlendum hlutabréfum og skuldabréfum, og sagði seðlabankinn í dag að vöxt sjóðsins undanfarið mætti rekja til mikillar hækkunar á alþjóðlegum hlutabréfamörkuðum.

• 1 blogg um fréttina

Bloggað um fréttina

• Eyþór Eðvarðsson í Vilnius: 19.374.240.000.000.000.000,00 íslenskar krónur