Árás gæti flýtt fyrir kjarnorkuvæðingu Írana

Árás á Íran myndi að öllum líkindum leiða til þess að stjórnvöld þar hertu enn á kjarnorkuvæðingu sinni og kæmu sér upp kjarnavopnum. Það gæti gerst á nokkrum mánuðum. Þetta er mat Frank Barnaby, sérfræðings í kjarnorkuvísindum og kjarnavopnaframleiðslu og kemur fram í skýrslu fyrir rannsóknarmiðstöð í Oxford á Englandi.

Þar segir að þar sem ónægar heimildir eða sannanir séu fyrir umfangi kjarnorkumannvirkja Írana sé ólíklegt að hægt sé að koma í veg fyrir kjarnorkuáætlanir ríkisins. Því yrði fljótlega hægt að hefja þá vinnu á ný eftir árás og þá yrðu stjórnvöld þar enn harðari í andstöðu sinni við Vesturlönd en áður. Stuðningur við kjarnavopnavæðingu myndi aukast meðal landsmanna.

Ótti manna vex við að Bandaríkjamenn eða Ísraelar geri loftskeyta- og eldflaugaárásir á Íran vegna kjarnorkudeilunnar. Í skýrslunni segir að líklegt sé að Íranar hafi komið sér upp aðstöðu til kjarnorkuvinnslu á leynilegum stöðum. Þá sé einnig líklegt að Íranar hafi reist byggingar til blekkingar, þ.e. að önnur ríki haldi að þær séu kjarnorkumannvirki. Sky segir frá þessu.

• 2 blogg um fréttina

Bloggað um fréttina

• Guðmundur Ágúst Sæmundsson: Hugmynd að lausn
• Haukur Nikulásson: Bandaríkin eru helsta ófriðarógn heimsins