Bandaríkin neita að skiptast á föngum við Írana

Bandarískir embættismenn segja að það komi ekki til greina að skipta á 15 breskum sjóliðum, sem Íranar handtóku í Persaflóa, og fimm Írönum, sem bandarískar hersveitir tóku höndum í Írak.

Talsmaður utanríkismálaráðuneytisins, Sean McCormack, hafnaði slíkum hugmyndum um fangaskipti.

Fram kemur á fréttavef BBC að fimmmenningarnir, sem eru taldir vera meðlimir í íranska byltingaverðinum, hafi verið teknir höndum í janúar í borginni Irbil í Írak.

Bresk stjórnvöld hafa alfarið neitað því að bresku sjóliðarnir hafi verið í íranskri landhelgi þegar þeir voru handteknir þann 23. mars sl.

Íranarnir fimm voru handteknir eftir áhlaup Bandaríkjahers. Þeir voru með útbúnað sem Bandaríkjamenn segja að sýni fram á með beinum hætti tengsl þeirra við net manna sem útvega íröskum uppreisnarmönnum tækni- og vopnabúnað.

Þá hafa bandarískir embættismenn fordæmt aðgerðir Íranar og lýst yfir opinberum stuðningi við Breta í deilunni.

• 1 blogg um fréttina

Bloggað um fréttina

• Björn Heiðdal: Nostradamus og USA.