Bandaríkin bregðast ókvæða við kjarnorkuyfirlýsingu Írana

Bandaríkin hafa gagnrýnt Írana fyrir að hafa tilkynnt að þeir geti nú framleitt kjarnorkueldsneyti í miklu magni. „Íran heldur áfram að ögra alþjóðasamfélaginu og einangra sig enn frekar með því að útvíkka kjarnorkuáætlun sína,“ sagði bandarískur embættismaður.

Mahmoud Ahmadinejad, forseti Írans, sagði í gær að Íranar væru nú komnir í „kjarnorkufélag þjóðanna“, segir á vef BBC.

Íranar halda því fram að kjarnorkuáætlun sín sé í friðsömum tilgangi en Vesturveldin hafa áhyggjur af því að Íranar vilji framleiða kjarnorkusprengjur.

„Við höfum miklar áhyggjur af tilkynningu Írana að þeir hafi komist á „iðnaðarstig“ hvað varðar framleiðslu á kjarnorkueldsneyti,“ segir Gordon Johndroe, talsmaður þjóðaröryggisráðs Hvíta hússins.

Breskur embættismaður sagði að tilkynning Írana væri merki um „frekari brot á ályktunum Alþjóðakjarnorkumálastofnunarinnar og Sameinuðu þjóðanna.“

Evrópusambandið endurnýjaði jafnframt ákall sitt um að Íranar hætti að auðga úran, og Ban Ki-moon, framkvæmdastjóri SÞ, hvatti Írana til þess að framfylgja ályktun öryggisráðs SÞ.

SÞ hefur samþykkt tvær ályktanir um að beita Írana refsiaðgerðum fyrir að neita að hætta við kjarnorkuáætlun sína.

• 2 blogg um fréttina

Bloggað um fréttina

• Haukur Nikulásson: Bandaríkjamenn halda áfram að ögra heimsfriði sem fulltrúi "alþjóðasamfélagsins"
• Snorri Bergz: Íranir að smíða kjarnorkusprengju?