Fundu 20 tonn af kókaíni í flutningaskipi

Bandaríska strandgæslan sagðist í dag hafa lagt hald á 20 tonn af kókaíni um borð í flutningaskipi við strendur Panama. Þetta gerðist um miðjan síðasta mánuð en efninu var í dag skipað upp á hafnarsvæði strandgæslunnar nálægt Oakland í Kalíforníu.

Um er að ræða eitt mesta fíkniefnamagn, sem lagt hefur verið hald á í einu en verðmæti kókaínsins í götusölu er áætlað 600 milljónir dala, jafnvirði nærri 39 milljarða króna.

Reutersfréttastofan hefur eftir Brock Eckel, liðsforingja, að um sé að ræða stærsta fíkniefnamál, sem komið hafi upp í Bandaríkjunum og eitt mesta fíkniefnamagn, sem nokkru sinni hafi fundist um borð í skipi.

14 manna áhöfn frá Panama og Mexíkó var um borð í flutningaskipinu þegar varðskipið Sherman stöðvaði það. Áhöfnin var óvopnuð og sýndi enga mótspyrnu þegar liðsmenn strandgæslunnar kröfðust þess að fá að leita um borð.

• 1 blogg um fréttina

Bloggað um fréttina

• Sigfús Sigurþórsson.: 20 milljón grömm af fíkniefnum.