Herlið NATO gagnrýnt fyrir meint samþykki við valmúarækt

Herlið Atlantshafsbandalagsins, NATO, í Afganistan (Isaf) hefur hætt birtingu útvarpsauglýsingar sem skilja mátti sem samþykki fyrir valmúgarækt. Talsmaður herliðsins segir orðalag hennar hafa verið óljóst en í auglýsingunni sagði að herliðið hefði skilning á því að flestir Afganar ættu ekki annarra kosta völ en að rækta valmúa til að sjá sér farborða og að herliðið væri ekki í landinu til að berjast gegn slíkri ræktun heldur til að tryggja öryggi og elta uppi erlenda vígamenn. Þetta kemur fram á fréttavef BBC.

Áður höfðu afgönsk yfirvöld og Sameinuðu þjóðirnar kvartað undan auglýsingunni sem útvarpað var á kostnað herliðsins í Helmand-héraði.

„Isaf gerði mistök, segir Zalmay Afzali, talsmaður þess ráðuneytis sem fer með baráttuna gegn framleiðslu fíkniefna í landinu. „Við förum fram á að Isaf leggi sig fram um að forðast slík mistök í framtíðinni þar sem þau geta skapað heljarstór vandamál fyrir þá sem eru að reyna að framfylgja þeirri stefnu afganskra stjórnvalda að berjast gegn framleiðslu fíkniefna.

• 1 blogg um fréttina

Bloggað um fréttina

• Púkinn: Ópíumvalmúinn