Stöðvuð með 86 poka af kókaíni innvortis

Kona var stöðvuð með 86 poka með 1,5 kíló af kókaíni innvortis á Gardemoen flugvelli í Ósló í Noregi. Konan er 26 ára og kom með flugi frá heimalandi sínu, Nígeríu. Ef einn pokanna hefði rifnað hefði það dugað til að bana konunni.

Aftenposten skýrir frá því á vefsíðu sinni að konan hafi sagt yfirvöldum að hún hafi gert þetta til að hjálpa börnum sínum í Nígeríu.

Norsk tollayfirvöld telja að þetta magn sé met. Í það minnsta hefur kona aldrei verið tekin með jafn mikið magn af eiturlyfjum innvortis en karlmaður var eitt sinn stöðvaður í Kristiansand með 1,6 kíló.

Konan var stöðvuð á miðvikudaginn í síðustu viku. Farið var með hana á sjúkrahús. Síðan var hún dæmd í fjögurra vikna varðhald. Hún á yfir höfði sér allt að tíu ára fangelsi.

• 2 blogg um fréttina

Bloggað um fréttina

• Þorsteinn Gunnarsson: Það hefur ekki hrjáð hana lystarleysið
• Svava frá Strandbergi : Dugað til að bana