Erlent | mbl | 28.5.2007 | 9:37

Bandaríkjamenn ræða við Írana um málefni Íraks

Nuri al-Maliki, sem situr við enda borðsins, stýrir fundi íranskra og bandarískra embættismanna í Bagdad í morgun. Reuters

Sendiherrar Bandaríkjanna og Írans í Írak hafa í dag átt fund um stöðu öryggismála í Írak. Eru þetta fyrstu tvíhliða viðræður þjóðanna tveggja í nærri þrjá áratugi. Fundurinn fer fram á skrifstofu Nouris al-Malikis, forsætisráðherra Íraks.

Fundinn sitja Ryan Crocker, sendiherra Bandaríkjanna í Írak, og Hassan Kazemi Qomi, sendiherra Írans. Búist er við að Bandaríkjamenn haldi því fram, að Írnar veiti uppreisnarmannahópum í Írak ýmsa aðstoð en Íranar munu minna Bandaríkjamenn á, að þar sem þeir hersitji Írak beri þeir höfuðábyrgð á að tryggja öryggismál í landinu.

Íranar sögðu um helgina að þeir hefðu flett ofan af nokkrum njósnahringjum sem Bandaríkjamenn og stuðningsríki þeirra hefðu stýrt í Íran. Var svissneski sendiherrann kallaður til fundar í gær og krafinn skýringa á njósnahringjunum en Svisslendingar eru fulltrúar Bandaríkjanna í Íran.

Fundurinn í dag ef fyrsti formlegi fundur Írana og Bandaríkjamanna frá því löndin slitu stjórnmálasambandi árið 1980 í kjölfar uppreisnarinnar í Íran og gíslatökunnar í bandaríska sendiráðinu í Teheran.