Ísraelsmenn gerðu loftárás á bíl á Gasasvæðinu

Ísraelsmenn gerðu í kvöld loftárás á bíl á Gasasvæðinu. Einn maður í bílnum lét lífið og þrír særðust. Herskáu samtökin Jihad sögðu, að mennirnir í bílnum hefðu verið í heilagri sendiferð, sem þýðir að þeir voru að undirbúa árás á Ísrael. Mahmud Abbas, forseti Palestínumanna og Ehud Olmert, forsætisráðherra Ísraels, munu ræða saman í Egyptalandi á morgun.

Ísraelsstjórn samþykkti í dag að greiða heimastjórn Palestínumanna skattfé, sem Ísraelsmenn innheimta en hættu að greiða eftir að heimastjórn undir forustu Hamassamtakanna tók við völdum á síðasta ári. Ísraelsmenn sögðu þó, að ekki mætti búast við miklum árangri af fundinum á morgun og höfnuðu tillögum Palestínumanna um að hefja án tafar viðræður um friðarsamning.

Hosni Mubarak, forseti Egyptalands, bauð Abbas, Olmert Abdullah Jórdaníukonungi til Sharm el-Sheik á morgun og er fundinum m.a. ætlað að sýna að Abbas nýtur alþjóðlegs stuðnings þótt hann eigi við mikla erfiðleika að etja heima fyrir.

• 1 blogg um fréttina

Bloggað um fréttina

• Úlfar Þór Birgisson Aspar: Jihad segja það sem auðvitað hentar hverju sinni.