"London verður sprengd"

Bílsprengjurnar sem fundust í London og voru gerðar óvirkar áður en þær ollu tjóni bera öll einkenni hópa á borð við al-Qaeda, að því er haft er eftir sérfræðingum í Bretlandi í dag. Tímasetning tilræðanna kann að hafa miðast við stjórnarskiptin, er Gordon Brown tók við af Tony Blair, eða koma í kjölfar aðalstignarinnar sem rithöfundinum Salman Rushdie var veitt.

"Það leikur enginn vafi á því að þetta ráðabrugg á rætur að rekja til Miðausturlanda," sagði óháður öryggismálagreinir í viðtali við fréttastofuna AFP. "Það sést á því hvernig sprengjurnar voru frágengnar. Þetta er einkenni Hezbollah og Hamas í Líbanon og Palestínu, og hópa á borð við al-Qaeda í Írak."

Leit stendur enn að ökumönnum bílanna tveggja sem sprengjunum var komið fyrir í. Í þeim var mikið af gashylkjum og nöglum. Bílunum hafði verið lagt í miðborginni.

Skilaboð sem birt voru á spjallsvæði á netinu, skömmu áður en sprengjurnar fundust, virðast benda til tengsla við íslamista. "London verður sprengd," sagði í skilaboðunum, sem birt voru á spjallsvæðinu Al-Hesbah, sem al-Qaeda hefur nokkrum sinnum notað.

Fjölmargir heittrúaðir íslamistar hafa harðlega mótmælt aðalstigninni sem Elísabet Englandsdrottning veitti Salman Rushdie, en margir telja hann hafa svívirt íslam með skáldsögunni Söngvar Satans.

• 4 blogg um fréttina

Bloggað um fréttina

• Guðmundur Ásgeirsson: Aðvörun: gegnsýrt af ónákvæmni og Bush-isma!
• Óskar Þorkelsson: einhvernvegin þá trúi ég þessum fréttum ekki..
• Sóley Valdimarsdóttir: Drífa sig svo
• Stefán Friðrik Stefánsson: Hryðjuverkaógnin vofir sem mara yfir London