Erlent | mbl | 19.7.2007 | 9:49

Smith: „Ég reykti kannabis"

Jacqui Smith, innanríkisráðherra viðurkenndi að hún reykti kannabis á háskólaárunum. Reuters

Innanríkisráðherra Bretlands, Jacqui Smith, viðurkenndi í útvarpsviðtali í morgun að hún hefði reykt kannabis á háskólaárum sínum, fyrir 25 árum. „Ég reykti nokkrum sinnum, ég tel að það hafi verið rangt af mér,” sagði Smith í samtali við Sky fréttastofuna í kjölfar útvarpsviðtalsins.

Smith sagðist hafa reykt hass og þó að hún hafi ekki snert eiturlyf í 25 ár þá afsakaði það ekki hegðun hennar.

„Ég er ekki að predika yfir neinum, ég braut lögin,” sagði hún í viðtalinu. Hún sagði jafnframt að Gordon Brown, forsætisráðherra hefði ekki spurt hvort hún hefði neytt eiturlyfja er hann bauð henni ráðherrastöðuna.

Þetta kom fram í kjölfar tilkynningar forsætisráðherrans um að hann íhugaði nú að herða lög um neyslu kannabis-efna.