Karlar ræði „karlréttindamál“

Karita Bekkemellem, ráðherra málefna barna og jafnréttis í Noregi, hefur skipað 32 manna nefnd - „Karlanefndina“ - sem ætlað er að koma af stað almennri umræðu um réttindi karla í t.d. heilbrigðismálum, menntamálum og í hjónaskilnuðum. Í nefndinni sitja menn af ýmsum toga úr mörgum atvinnugreinum.

Frá þessu greinir fréttavefur Aftenposten.

Nefndin kom saman á sportklúbbnum Bohemen í miðborg Óslóar í gærkvöldi, þar sem Bekkemellem kynnti nefndarmenn fyrir fjölmiðlum. Hún sagði að karlar sætu orðið á hakanum í menntakerfinu, fengju sjaldnast forræði yfir börnum sínum við skilnað og ættu við aðra sjúkdóma að etja en konur.

Karlanefndinni er ætlað að ræða þessi málefni og veita stjórnvöldum ráðgjöf við ritun hvítbókar [stefnuskrár] um karla og jafnrétti, sem koma á út næsta sumar. En meginverkefni karlanefndarinnar, sagði Bekkemellem, er að vekja almenna umræðu um réttindi karla.

„Þetta er gert til að beina athyglinni að réttindaskorti karla. Það er tími til kominn að þeir taki sjálfir þátt í þeirri umræðu. Konur geta ekki séð um hana fyrir þá,“ hefur Aftenposten eftir Bekkemellem.

Í nefndinni eru stjórnmálamenn, listamenn, leiðtogar í opinbera geiranum og einkageiranum og fleiri þekktir einstaklingar.

• 5 blogg um fréttina

Bloggað um fréttina

• Snorri Bergz: Maskúlínismi
• Daði Einarsson: Timanna tákn?
• Oddgeir Einarsson: Menntun og jafnrétti
• Gísli Gíslason: Jafnrétti er gagnvirkur ferill.
• Jóhannes Ragnarsson: Jafnréttismál karla og kvenna á skynsemisgrundvöll, takk.