Rannsaka myndband er virðist sýna aftöku í Rússlandi

Rússnesk yfirvöld eru að rannsaka myndband sem virðist sýna hægri öfgamenn taka tvo menn af lífi. Myndbandið var birt á nokkrum vefsetrum og á því má sjá annan manninn afhöfðaðan og hinn skotinn. Annað fórnarlambið var frá rússneska sjálfstjórnarlýðveldinu Dagestan, en hinn frá Tadjíkistan, að því er fram kemur á myndunum.

Hópur sem kallar sig Þjóðernissósíalista og hvítt vald hefur lýst aftökunum á hendur sér. Ofbeldi gegn fólki frá Kákasuslýðveldunum og löndum í Mið-Asíu hafa færst í vöxt í Rússlandi á undanförnum árum.

Talsmaður rússneska innanríkisráðuneytisins sagði að rannsókn málsins hefði leitt í ljós að netþjónarnir sem vistuðu myndbandið séu erlendis. Hafi erindi þegar verið sent til yfirvalda í viðkomandi ríkjum.

Fórnarlömbin eru með hendur og fætur bundna og fregnir herma að heyra megi þá segja: Við höfum verið handteknir af rússneskum þjóðernissósíalistum. Tveir menn með grímur heilsa að nasistasið áður en aftökurnar fara fram.

Ekki hefur verið staðfest að myndbandið sé ekta.

• 1 blogg um fréttina

Bloggað um fréttina

• Jóhannes Ragnarsson: Hægri öfgamenn myrða tvo menn í Rússlandi.