Þriggja daga þjóðarsorg í Perú

Alan Garcia, forseti Perú hefur lýst yfir þriggja daga þjóðarsorg í Perú, enn er verið að tína lík úr rústum í borgum og bæjum í Suður-Perú en tala látinna er talin vera komin upp í 500. Lík- og sjúkrahús eru yfirfull eftir skjálftann sem mældist 8 stig og reiknað er með að tala látinna eigi eftir að stíga.

Garcia forseti lýsti í gær yfir neyðarástandi og í dag var ákveðið að þjóðarsorg ríki í þrjá daga í landinu og að opinberar stofnanir á borð við skóla, söfn og herstöðvar skuli vera lokaðar í þann tíma.

Forsetinn sendi í gær þrjá ráðherra úr ríkisstjórn sinni á svæðið og Reuters fréttastofan skýrði frá því að í dag hafi hann sjálfur heimsótt skjálftasvæðið.

Talsmaður Sameinuðu Þjóðanna, Margareta Wahlstöm segir í samtali við BBC að rafmagn og sími liggi niðri og að um 80% húsa hafi hrunið á skjálftasvæðinu og að eyðileggingin sé gríðarleg.

Wahlström sagði að nú þegar væru ýmsar hjálparstofnanir innan SÞ búnar að lofa næstum því einni milljón Bandaríkjadala til hjálparstarfsins.

• 1 blogg um fréttina

Bloggað um fréttina

• María Anna P Kristjánsdóttir: Tárin renna nidur kinnarnar á mér vid ad horfa á …