Ber forseti vekur athygli

Í rússneskum fjölmiðlum hefur undanfarna viku mikið verið fjallað um myndir sem birtust á heimasíðu Vladimirs Pútin, forseta Rússlands, þar sem hann sést vöðvastæltur og ber að ofan í fríi sínu með Alberti Mónakóprins í fjöllunum í Síberíu.

Myndirnar hafa síðan birst í fjölmiðlum og notaði götublaðað Komsomolskaya Pravda myndina á forsíðu sinni í dag með leiðbeiningum og æfingum fyrir lesendur sem vilja ná upp þeim vöðvastyrk sem forsetinn virðist búa yfir með fyrirsögninni Vertu eins og Pútin.

Fréttaskýrendur hafa túlkað þessar myndir með ýmsum hætti, sumir telja að Pútin sé að búa sig undir að hætta líkt og stjórnarskrá landsins segir fyrir um í lok næsta árs.

Aðrir telja að myndunum sé ætlað að styrkja ímynd hans meðal kjósenda.

Á spjallsíðum samkynhneigðra kemur fram að myndirnar hafa vakið mikla lukku og telja sumir að með þeim sé Pútin að boða aukið umburðalyndi í garð samkynhneigðra í Rússlandi.

Ein skopstæling á myndunum setur þá Pútin og prins Albert í hlutverk smalanna í kvikmyndinni Brokeback Mountain. Putin sem er 54 ára, giftur og tveggja barna faðir hefur löngum ýtt undir karlmannlega ímynd sína og er hann þekktur fyrir íþróttaiðkanir og kemur oft fram í fjölmiðlum þar sem hann sést við stýrið á stórum trukkum og við stjórnvölin á stórvirkum hertækjum.

Hafa fréttaskýrendur einnig bent á að hann hafi viljað rækta ímynd sem væri fjarri forvera sínum í starfi, Boris Jeltsin sem var þekktur fyrir drykkju og svall.

Heimasíða forseta Rússlands

• 2 blogg um fréttina

Bloggað um fréttina

• Ásta Gunnlaugsdóttir: Ussu!
• Hallgrímur Egilsson: Hvernig er Ólafur Ragnar ber að ofan...