Bush fagnar samkomulagi Íraksleiðtoga

George W. Bush Bandaríkjaforseti segist fagna því sáttarsamkomulagi sem íraskir leiðtogar hafa undirritað. Bush varar þó við því að enn sé margt eftir óunnið í baráttunni við að kveða niður trúarbragðaátök í Írak.

Bush lét ummælin falla í dag, degi eftir að Nouri al-Maliki, forsætisráðherra Íraks, tilkynnti um samkomulagið sem stjórnmálaleiðtogar sjíta, súnníta og Kúrda undirrituðu.

„Þessir leiðtogar [...] viðurkenna þá sönnu og þýðingafullu sátt sem verður að eiga sér stað,“ sagði Bush.

Bandarískir stjórnmálamenn hafa að undanförnu verið harðorðir í garð ríkisstjórnar Malikis. „Samkomulagið frá því í gær endurspeglar þá skuldbindingu þeirra (leiðtoga Íraks) að vinna saman í þágu allra Íraka,“ sagði Bush er hann var staddur í Albuquerque í Nýju-Mexíkó.

Bush sagði að samkomulagið væri mikilvægt skref, en að hann hafi sagt við Íraksleiðtogana að margt væri enn eftir ógert.

„Íraska þingið mun koma saman snemma í september og það þarf að binda þetta stjórnmálaferli í lög,“ sagði Bush.

Bandaríkjastjórn hefur þrýst mjög á að þetta samkomulag náist. Hún segir að þetta sé mikilvægt skref í áttina að því að skapa samstöðu meðal þjóðarinnar og binda enda á trúarátökin í Írak.

Fréttavefur BBC greindi frá þessu.

• 1 blogg um fréttina

Bloggað um fréttina

• Markús frá Djúpalæk: Að fagna