Erlent | mbl | 15.9.2007 | 10:09

Má aftur reykja á lóðinni sinni

„Þetta er frábært. Ég sit hér í sólinni og reyki og drekk kaffi," segir kona í bænum Åkarp í nágrenni Malmö við blaðið Sydsvenskan. „Ég er að halda upp á að ég má aftur reykja í trjágarðinum mínum."

Umhverfisdómstólar í Svíþjóð hafa í tvö ár fjallað um deilu milli konunnar og nágranna hennar, sem krafðist þess að konunni yrði bannað að reykja úti í garðinum sínum. Sagðist nágranninn vera afar viðkvæmur fyrir tóbaksreyk og þyrfti að setja á sig grímu þegar hann færi út úr húsinu og framhjá garði konunnar.

Umhverfisdómstóll í Suður-Svíþjóð ákvað í ágúst að setja bráðabirgðabann við því að konan reykti á ákveðnum svæðum í garðinum en konan kærði úrskurðinn yfir yfirdómstólsins sem hefur fellt bráðabirgðabannið úr gildi. Dómstólarnir eiga enn eftir að skera úr um það hvort konan megi reykja undir eplatrjánum sínum.