Eistar banna olíuleiðslu í Eystrasalti

Eistnesk stjórnvöld hafa ákveðið að veita ekki þýsk-rússneska félaginu Nord Stream, sem er að hluta í eigu rússneska ríkisfélagsins Gazprom, leyfi til að gera botnrannsóknir í lögsögu Eistlands í Eystrasalti með það fyrir augum að leggja þar gasleiðslu. Nord Stream segir að væntanlega verði leiðslan lögð í finnskri lögsögu eins og upphaflega var áformað.

Eistar hafa verið tvístígandi eftir að rússneskir embættismenn tilkynntu, að rússneski herinn gæti gætt öryggis á svæðinu á meðal leiðslan yrði lögð og einnig eftir að leiðslan yrði tekin í notkun.

Gazprom og þýsku fyrirtækin BSAF og E.ON stofnuðu Nord Stream og samþykktu árið 2005 að leggja 1200 km langa gasleiðslu á botni Eystrasalts til Evrópu og Rússlands. Upphaflega stóð til að leggja leiðsluna í lögsögu Rússlands, Finnlands, Svíþjóðar, Danmerkur og Þýskalands. Finnar sögðu hins vegar að finna þyrfti aðra leið vegna of mikilla umhverfisáhrifa og þá óskaði Nord Stream eftir að Eistlendingar veittu rannsóknarleyfi.

• 1 blogg um fréttina

Bloggað um fréttina

• G. Tómas Gunnarsson: Ekki undarlegt