Sprengjueftirlíkingin reyndist tæknilistaverk

Nítján ára stúlka að nafni Star Simpson, sem handtekin var á Logan alþjóðaflugvellinum í Boston fyrr í dag fyrir að koma á flugvöll með sprengjueftirlíkingu festa utan á sér reyndist einungis vera óvenjulega klædd. Stúlkan, sem er nemi við MIT tækniháskólann, klæddist svartri hettupeysu með tæknilistaverki, tölvumóðurborði með blikkandi ljósum, þegar hún fór á flugvöllinn til að taka á móti vini sínum.

Aldrei mun hafa verið ætlunin að líkja eftir sprengju, en vel þjálfaðir bandarískir flugvallarstarfsmenn tengdu tölvubúnað, víra og blikkandi ljós við hryðjuverkaógnina.

Uppátækið vakti litla lukku á flugvellinum og var stúlkan handtekinn umsvifalaust af vopnuðum vörðum og færð í varðhald. Hún var svo síðar ákærð í dag fyrir að vera með eftirlíkingu af vopni í fórum sínum.

Til að bæta gráu ofan á svart var hún með módelleir í höndunum þegar hún gekk inn á flugvöllinn, sem vakti enn frekari grunsemdir.

Fréttastofan AP hafði það eftir lögreglu fyrr í dag það hafi verið mildi að öryggisverðir fylgdu reglum í einu og öllu og skutu ekki á stúlkuna.

• 1 blogg um fréttina

Bloggað um fréttina

• Páll Thayer: Þetta er ekki tölvumóðurborð...