Eintak af Magna Carta selt á uppboði í desember

Eintak af Magna Carta, skilmálaskrá sem Jóhanni konungi landlausa var gert að undirrita 15. júní 1215 eftir uppreisn lénsaðalsins gegn óstjórn og skattheimtu konungs, verður selt á uppboði í New York í desember. Talið er að skjalið verði selt á um 30 milljónir dala á uppboði hjá Sothebys.

Mjög sjaldgæft er að skjal sem þetta sé selt á uppboði en einungis eru til á annan tug eintaka af skjalinu og er líklegt að þetta sé eina eintakið sem muni nokkurn tíma koma í sölu á uppboði. Tvö eintök af Magna Carta eru til utan Bretlands og er annað í eigu Ástralíu. Hagnaður af sölunni mun renna til góðgerðarmála á vegum milljarðamæringsins og fyrrum forsetaframbjóðandans Ross Perot. Eintakið sem selt verður á uppboðinu er í eigu Perot en stofnun á hans vegum keypti það árið 1984.

Magna Carta sem er latína þýðir á íslensku hin mikla skrá. Þrátt fyrir að skjalið hafi verið undirritað árið 1215 þá öðlaðist það ekki lagagildi í Englandi fyrr en 1297. Stjórnarfarslegt gildi Magna Carta fólst fyrst og fremst í skírskotun þingsins til hennar í valdabaráttu konungs og þings á 17. öld og í raun tryggði hún aðeins réttindi aðals og kirkju.

• 1 blogg um fréttina

Bloggað um fréttina

• Magnús Geir Guðmundsson: Hugur fer á flakk. - Um Ross, Ríkharð og fleiri!