Myndin ekki af Madeleine McCann

Myndin sem var verið að rannsaka í Marokkó er ekki af Madeleine McCann sem hvarf sporlaust þann 3. maí sl. í Algarve-héraði í Portúgal. Samkvæmt upplýsingum Sky sjónvarpsstöðvarinnar er myndin af stúlku sem býr í Marokkó. Á myndinni sem rannsökuð var af Interpol má sjá glitta í ljósan koll á baki konu sem ber barn á bakinu. Myndin var tekin af spænskum ferðamanni, Clöru Torres, í Zinat í norðurhluta Marokkó þann 31. ágúst.

Torres sagði í viðtali við spænska útvarpsstöð að hún hefði tekið fjölda mynda út um glugga á rútu er hún sá ljóshærða barnið.

Hún segist hafa látið sér detta týnda stúlkan í hug en gleymdi að hún hafði tekið mynd af henni uns hún frétti að aðrir ferðamenn hefðu sagst hafa séð Madeleine í Marokkó.