Sjónvarpsmenn fundu skipsflak frá sautjándu öld

Sænskir sjónvarpsmenn fundu heillegt skipsflak frá sautjándu öld á botni Eystrasalts er þeir voru að undirbúa tökur á ævintýraþáttum, að því er sænska ríkissjónvarpið SVT greindi frá í dag. Um er að ræða 20 metra langt kaupskip. Það fannst úti fyrir suðausturströnd Svíþjóðar á um 125 m dýpi.

„Það sat bara þarna á botninum, næstum eins og það hefði dottið beint niður af yfirborðinu,“ sagði Madeleine Sinding-Larsen, talskona SVT.

Skipið fannst í maí, þegar verið var að undirbúa tökur á sjónvarpsþáttum um sjávarfornleifafræðinga sem rannsaka botn Eystrasaltsins. Sjónvarpsstöðin ákvað að segja ekki frá flakinu fyrr en í dag, þegar fyrsti þátturinn verður sýndur.

Ekki liggur fyrir hvers lenskt skipið hafi verið, en útlit þess bendi til að Hollendingar hafi smíðað það.

• 1 blogg um fréttina

Bloggað um fréttina

• Vilhjálmur Örn Vilhjálmsson: Einstakur viðburður