Lokatilraun til að handsama landflótta nasista

Wiesenthal stofnunin hefur hrint af stað verkefni þar sem reynt verður „í síðasta sinn" að hafa uppi á stríðsglæpamönnum sem frömdu glæpi í valdatíð nasista í Þýskalandi á fjórða og fimmta áratug síðustu aldar. Verkefnið stendur saman af auglýsingaherferð og peningagreiðslum til þeirra sem veita upplýsingar sem leiða til sakfellingar.

Ætlunin er að auglýsa í fjórum löndum, Chile, Úrúgvæ, Argentínu og Brasilíu, en fjöldi fyrrum nasista flýði til þessara landa eftir að síðari heimsstyrjöldinni lauk.

Svipuðum aðferðum var beitt í Litháen, Lettlandi og Eistlandi árið 2002, en þá fengust nöfn 488 grunaðra í 20 löndum. 99 málanna hafa verið send saksóknurum og hafa þrjár handtökuskipanir verið gefnar út, tvær framsalsbeiðnir og eru tugir mála enn í rannsókn.

Rúmlega sextíu ár eru frá því að síðari heimsstyrjöldinni lauk og er því viðbúið að þeir sem eftir lifa og hafa ekki komist í hendur réttvísinnar sú orðnir ansi aldraðir. Verkefnið ber enda titilinn „Síðasta tækifærið".

Stofnandi Wiesenthal stofnunarinnar, Símon Wiesenthal, lést fyrir tveimur árum, hann var einn þeirra sem lifðu af dvöl í útrýmingarbúðum nasista, en um sex milljónir gyðinga voru myrtar í slíkum búðum. Fyrir hans tilstilli hafa meira en 1.100 stríðsglæpamenn verið dæmdir fyrir voðaverk sín.

• 3 blogg um fréttina

Bloggað um fréttina

• Gunnar Th. Gunnarsson: Of langt gengið
• Níels A. Ársælsson.: Solsikken
• Sæþór Helgi Jensson: ætla þeir að arka á elliheimilinn