19 ára byssumaður vildi öðlast frægð

Maðurinn sem skaut átta manns til bana í verslunarmiðstöð í Omaha í Bandaríkjunum áður en hann framdi sjálfsvíg var 19 ára gamall. Mikil skelfing greip um sig í verslunarmiðstöðinni þegar árásarmaðurinn hóf skothríð.

„Nú verð ég frægur,“ skrifaði Robert Hawkins í sjálfvígsbréfi að því er leigusali hans sagði í samtali við CNN fréttastöðina. Leigusalinn segist hafa einni fundið erfðaskrá Hawkins .

Lögreglan hefur neitað að tjá sig nokkuð um efni bréfsins.

Fimm særðust í árásinni, þar af tveir lífshættulega. Hún átti sér stað fyrri part dags í Omaha í Nebraska. Flest fórnarlambanna í Westroads verslunarmiðstöðinni voru skotnir í Von Maur stórversluninni skammt frá barnadeildinni.

„Þetta var hræðilegt, gjörsamlega hræðilegt,“ sagði ein kona í samtali við KETV sjónvarpstöðina. Hún segist hafa falið sig undir fatahrúgu um leið og skotin riðu af.

Árásin bætist í hóp fjölda annarra svipaðra árása sem hafa átt sér stað í Bandaríkjunum að undanförnu.

Hvíta húsið sendi frá sér yfirlýsingu vegna árásarinnar þar sem fram kemur að atburðurinn sé harmaður.

Fréttavefur Reuters greindi frá. 

• 1 blogg um fréttina

Bloggað um fréttina

• Soffía Sigurðardóttir: Og sjá, við veitum þér frægð!