Al Aqsa samtökin leyst upp

Abdel-Razak al-Yahya, innanríkisráðherra í heimastjórn Palestínumanna, segir yfirvöld á palestínsku sjálfstjórnarsvæðunum nú vinna að því að leysa upp herská samtök Palestínumanna á Vesturbakkanum.  Segir hann Al Aqsa samtökin sem eru tengd Fatah hreyfingu Mahmoud Abbas, leiðtoga Palestínumanna, vera á meðal þessara samtaka. Þetta kemur fram á fréttavef Ha’aretz. 

„Al Aqsa samtökin eru ekki lengur til,” sagði hann í útvarpsviðtali í dag en í gær lýsti talsmaður samtakanna því yfir að þau hefðu staðið á bak við skotárás á þrjá Ísraela á Vesturbakkanum. Tveir Ísraelanna létu lífið í árásinni.

Yfirvöld á palestínsku sjálfstjórnarsvæðunum greindu frá því í dag að hópur manna hefði verið handtekinn vegna málsins og  Salam Fayyad, forsætisráðherra heimstjórnarinnar vottaði aðstandendum hinna látnu samúð sína í dag. Þá sagði hann handtökur þeirra sem hlut áttu að máli sýna að yfirvöldum á palestínsku sjálfstjórnarsvæðunum sé full alvara með það  að koma á lögum og reglu á Vesturbakkanum.

• 1 blogg um fréttina

Bloggað um fréttina

• Víglundur Piertew Mettinisson: Sama ruglið aftur og aftur......