Hjálparstarf hafið í Kenýa

Bílalest með matvælum er á leiðinni frá hafnarborginni Mombasa í Kenýa á leið til Nairobi og á svæði þar sem marga heimilislausa flótta menn er að finna eftir átökin undanfarna viku. Matvælaflutningar hafa legið niðri í landinu síðan að óeirðir brutust út í kjölfar kosninganna í síðasta mánuði.

Samkvæmt fréttavef BBC hafa 350 manns látist í átökunum en Sameinuðu Þjóðirnar telja að um 250 þúsund manns hafi misst heimili sín og sofi í almenningsgörðum, á lögreglustöðum eða í kirkjum.

Í bílalestinni eru 20 vörubílar með matvæli sem nægja 35 þúsund manns í einn mánuð. Telja hjálparstofnanir að skortur á matvælum og vatni gæti valdið því að ýmsir sjúkdómar fari að berast manna á meðal á næstu dögum.