151.000 sagðir hafa fallið í Írak

Um 151.000 Írakar eru sagðir hafa fallið í Írak frá því Bandaríkin og bandamenn þeirra réðust inn í landið árið 2003. Þetta er meðal niðurstaðna í viðamikilli rannsókn á mannfalli meðal Íraka. 

Talan er um fjórðungi lægri en sú tala sem birtist í umdeildri grein í læknatímaritinu Lancet í október 2006. Talan er hinsvegar þrefalt hærri en sú sem samtökin Iraq Body Count hafa birt yfir mannfall í Írak, að því er fram kemur á fréttavef BBC.

Rannsóknin var unnin af íraska heilbrigðisráðuneytinu fyrir Alþjóðlegu heilbrigðisstofnunina. Hún byggir á viðtölum við 9.000 fjölskyldur um gjörvallt Írak. Fram kemur að rúmlega helmingur allra dauðsfalla hafi verið í Bagdad.

Rannsóknin tekur aðeins til tímabilsins frá mars árið 2003 til júní árið 2006.

Þá segir að ofbeldisverk sé orðin meginorsök dauðsfalla fullorðinna Íraka. Meðal karla á aldrinum 15 - 59 ára  er það meginorsökin.

• 2 blogg um fréttina

Bloggað um fréttina

• Birgitta Jónsdóttir: Því miður var þetta fyrirséð
• Guðrún Emilía Guðnadóttir: Um 151.000, eins og hálf Íslenska þjóðin.