Ísraelar misreiknuðu áhrifin

Ísraelskir embættismenn sögðu í morgun að áhrif eldsneytisskorts á Gasasvæðinu, vegna aðgerða Ísraela, væru meiri en ísraelsk yfirvöld hafi séð fyrir. Ísraelar drógu mjög úr eldsneytisflutningi til svæðisins á föstudag og í gær var einu raforkustöð þess lokað vegna eldsneytisskorts. Þetta kemur fram á fréttavef Ha’aretz. Áður hafði talsmaður ísraelska varnarmálaráðuneytisins sakað Hamas-samtökin um að ýkja áhrif eldsneytisskortsins til að afla málstað sínum fylgis á alþjóðavettvangi. 

Algert rafmagnsleysi er nú í Gasasborg og eru tæki sjúkrahúsa þar knúin með varaafli sem talsmenn Hamas segja að muni ekki endast nema í örfáa daga.

 Ónafngreindir ísraelskir embættismenn segja að rafstöðin, sem um ræði sjái íbúum Gasasvæðisins einungis fyrir litlum hluta þess rafmagns sem þar sé nýtt. 75% þess komi frá Ísrael og 5% þess komi frá Egyptalandi. Því hafi ekki verið hægt að sjá fyrir að lokun raforkuversins hefði jafn umfangsmikil áhrif og raun sé á.