Framboð Giulianis á bláþræði

Rudy Giuliani gaf í skyn í gær, að sigri hann ekki í forkosningum Repúblíkanaflokksins í Flórída sem fram fara í dag, kunni hann að draga sig út úr baráttunni um að verða forsetaefni flokksins. Kannanir benda til að hann nái í mesta lagi þriðja sæti í Flórída.

„Ég vænti þess að sigra,“ sagði Giuliani í dag. „Maður veltir ekki fyrir sér möguleikanum á tapi. Það gerir maður ekki á kjördag.“

Giuliani hefur lagt allt kapp á að sigra í Flórida, enda fullyrðir hann að sá frambjóðandi sem vinnur forkosningarnar þar muni tryggja sér sigur í forkosningunum.

„Við tökum ákvörðun á miðvikudagsmorguninn,“ sagði Guiliani við fréttamenn í gær um hvort hann haldi áfram framboði sínu þótt hann sigri ekki í Flórída.

Samkvæmt skoðanakönnunum hefur John McCain forskot í Flórída, en Mitt Romney hefur lítið eitt minna fylgi.

• 2 blogg um fréttina

Bloggað um fréttina

• Stefán Friðrik Stefánsson: Spenna í Flórída - Giuliani búinn að vera?
• Ólafur Als: Kistulagning framboðs Giuliani hefst í Florida