Kanadamenn hóta að draga herlið sitt frá Afganistan

Stephen Harper, forsætisráðherra Kanada, hefur hótað því að kanadískir hermenn verði sendir heim frá Afganistan ef aðrar þjóðir sendi ekki 1000 hermenn til hættulegra svæða í landinu.

Harper segir að Kanadamenn muni ekki halda áfram að sætta sig við að kanadískir hermenn falli við störf á hættulegum stöðum ef önnur lönd taki ekki á sig meiri ábyrgð.

2.500 kanadískir hermenn eru nú í Kandahar-héraði í Afganistan, sem er eitt það hættulegasta í landinu. Tæplega 80 kanadískir hermenn hafa látið lífið í héraðinu og hefur minnihlutastjórn Harpers verið gagnrýnd vegna þess.

Kanadíski herinn hefur skuldbundið sig til að starfa í Afganistan til ársins 2009, og lætur Harper að því liggja að sá samningur verði ekki framlengdur ef ekkert verði að gert til að fjölga í fjölþjóðaliðinu í héraðinu.

• 1 blogg um fréttina

Bloggað um fréttina

• Kristín M. Jóhannsdóttir: Gungan Harper