Sex létust í árás á skóla

Árásarmaður myrti fimm nemendur og framdi síðan sjálfsvíg við  DeKalb háskólann í N-Illinois, skammt frá Chicago. Tuttugu og einn urðu fyrir skotum er árásarmaður hóf skothríð í fyrirlestrarsal með 140 nemendum. Á vefsíðu skólans segir að átján séu alvarlega slasaðir.

Öllu skólahaldi við skólann hefur verið aflýst og hefur nemendum við skólann verið boðin áfallahjálp auk þess sem þeir hafa verið beðnir um að hringja í fjölskyldur sínar. Staðfest hefur verið á heimasíðu skólans að árásarmaðurinn var nemandi í félagsfræði við skólann í fyrra en var ekki innritaður í vetur.

Norður Illinois háskólinn er um hundrað kílómetrum frá Chicago í Illinois-ríki. Um 25.000 nemendur stunda nám við hann.
Árásarmaðurinn var svartklæddur með dökk sólgleraugu er hann gekk inn í fyrirlestrarsal þar sem 140 jarðfræðinemendur sátu. Hann var vopnaður haglabyssu og tveimur skammbyssum. Eftir tveggja mínútna skothríð frá sviðinu framdi hann sjálfsvíg.
Fjórir hinna látnu voru konur en eitt fórnarlamba árásarmannsins fyrir utan hann sjálfan var karl.