Sjálfstæði Kosovo lýst yfir á morgun

Hashim Thaci, forsætisráðherra Kosovo héraðs segir að yfirvöld í héraðinu muni lýsa formlega yfir sjálfstæði þess á morgun. Thaci sagði eftir fund sinn með trúarleiðtogum í héraðinu í dag að þá muni vilji íbúa héraðsins ná fram að ganga. Dagblöð í héraðinu segja að sjálfstæðisyfirlýsingin verði gefi út klukkan 14 að staðartíma.

Fyrr í dag samþykkti Evrópusambandið áætlun um að veita yfirvöldum í héraðinu aðstoð í öryggismálum, stjórnsýslu og dómsmálum eftir að sjálfstæði hefur verið lýst yfir. Stefnt er að því að 2.000 manns á vegum sambandsins verði við störf í landinu samkvæmt áætluninni frá og með næsta sumri.

Kosovo, er formlega hluti Serbíu en hefur verið undir yfirstjórn Sameinuðu þjóðanna frá árinu 1999. Serbar og serbneski minnihlutinn í landinu eru andvíg aðskilnaði héraðsins frá Serbíu en yfirvöld í Serbíu hafa lýst því yfir að þau hyggist þó ekki beita vopnavaldi til að reyna að koma í veg fyrir hann.

Kosovo Serbar við bænir í St. Dimitrije kirkjunni í bænum Kosovska í Mitrovica í Kosovo í dag. AP

• 2 blogg um fréttina

Bloggað um fréttina

• Jón Finnbogason: Við eigum að viðurkenna Kosovo strax.
• Jakob Falur Kristinsson: Aumingjaskapur