Ríkisstjóri New York verði ákærður til embættismissis

Repúblikanar í New York ríki munu sækjast eftir því að lögð verði fram ákæra á hendur Eliot Spitzer, ríkisstjóra í New York, til embættismissis, ef hann segir ekki af sér innan 48 klukkustunda, að sögn talsmanns þingmanns í minnihluta. 

Á fréttavef Reuters kemur fram að New York Times hafi greint frá því í gær að Spitzer hafi átt stefnumót með vændiskonu á hóteli í Washington.  Eftir það kom Spitzer fram opinberlega og baðst afsökunar á framferði sínu, en sagði ekki af sér embætti.

„Ríkistjórinn hefur 48 klukkustundir til þess að segja af sér, annars verður lögð fram ákæra á hendur Spitzer til embættismissis," sagði James Tedisco, talsmaður minnihlutans á ríkisþinginu í New York.  

Spitzer, sem er demókrati,  var kjörinn ríkisstjóri í New York í janúar í fyrra, en hafði þá verið dómsmálaráðherra ríkisins í átta ár. Í framboði sínu lagði hann mikla áherslu á siðferðisumbætur í stjórnkerfinu.

Í New York Times kom fram að Spitzer hafi greitt vændiskonunni 1000 dollara fyrir klukkustund en Alríkislögreglan tók það sem fór fram á fundi Spitzers með vændiskonunni upp á segulband. 

• 1 blogg um fréttina

Bloggað um fréttina

• Stefán Friðrik Stefánsson: Siðariddari í NY endar sem vændiskúnni nr. 9