Eliot Spitzer sagði af sér

Eliot Spitzer, ríkisstjóri í New York, sagði af sér embætti í dag og mun hann hætta störfum sem ríkisstjóri á mánudaginn.  Vararíkisstjóri, David Paterson, tekur við af Spitzer. 

„Í mínu opinbera starfi hef ég lagt áherslu á að fólk, sama í hvaða stöðu það er, taki ábyrgð á gjörðum sínum, sama gildir um sjálfan mig og því segi ég af mér embætti ríkisstjóra," sagði Spitzer á blaðamannafundi í New York.
 

Mjög hafði verið þrýst á Spitzer að segja af sér  eftir að tengsl hans við vændishring komust upp.  Spitzer er sagður hafa átt fund með vændiskonu á hóteli í Washington en alríkislögreglan hleraði samtöl hans og vændiskonunnar á fundi þeirra. 

New York Times greindi frá tengslum Spitzer við vændi á mánudaginn og eftir það kom hann fram opinberlega og baðst afsökunar á framferði sínu.  Í gær gáfu repúblikanar á ríkisþinginu Spitzer 48 klukkustunda frest til þess að segja af sér, annars yrði lögð fram ákæra á þinginu gegn honum til embættismissis.

Spitzer var kjörinn ríkisstjóri í New York í janúar í fyrra, en í framboði sínu til ríkisstjóra lagði hann mikla áherslu á siðferðisumbætur í stjórnkerfinu.  Um tíma gekk Spitzer undir nafninu „Wall Street löggan" en hann lagði  mikið uppúr að rannsaka og uppræta fjármálamisferli, skipulagða glæpi og vændi. 

Eliot Spitzer og kona hans. AP

• 5 blogg um fréttina

Bloggað um fréttina

• Óðinn Þórisson: Demókrati segir af sér
• Ómar Ingi: Myndir af stúlkunni sem Spitzer var gripinn glóðvolgur með
• Magnús Geir Guðmundsson: EFtirmaðurinn blindur blökkumaður!
• Jóhanna Magnúsar- og Völudóttir : Steinum kastað úr glerhúsi ..
• Ólafur Als: Vandræðalegt fyrir Demókrata og sérílagi Hillary